Հետամուտ լինելով նախկինում արձանագրած խնդիրների վերացմանը եւ շտկմանը` ՀՀ առողջապահական եւ աշխատանքի տեսչական մարմինը կրկնայցեր է կատարում խախտումներ թույլ տված տնտեսավարողների մոտ։ Կրկնակի դիտարկում է կատարվել նաեւ ավելի վաղ կասեցված»Վան» ատամնաբուժական կլինիկայում։
ԱԱՏՄ-ն, ելնելով իր կանոնադրական գործառույթներից եւ պարետի որոշումներից, հատուկ ուշադրություն է դարձնում բժշկական հիմնարկներում անվտանգության կանոնների եւ սանիտարահամաճարակային նորմերի պահպանմանը։
ՀՀ առողջապահական և աշխատանքի տեսչական մարմնի Հարավային տարածքային կենտրոնն ուժեղացված ստուգայցերի շրջանակում այսօր պարետի սահմանած կանոնների պահպանումը դիտարկել է Արարատի, Արմավիրի և Արագածոտնի մարզերի խոշոր արտադրական կազմակերպություններում, բժշկական կենտրոններում, ատամնաբուժական կլինիկաներում, դեղատներում և գեղեցկության սրահներում։
Ստուգայցերն այսօր առանձնակի խախտումներ չեն հայտնաբերել, իսկ նախկինում կասեցման համար հիմք հանդիսացած թերությունները վերացված են եղել «Գեոպրոմայնինգ Գոլդ»-ում և «Արարատցեմենտ»-ում:
Վերահսկողական աշխատանքների շրջանակում կասեցվում են այն կազմակերպությունները, որտեղ արձանագրվում են պարետի սահմանած անվտանգության կանոնների խախտումներ:
ԱԱՏՄ Հարավային տարածքային կենտրոնի մասնագետների հետևողական գործողություններն արձանագրում են շոշափելի դրական արդյունք:
Տնտեսավարողների բարեխիղճ մոտեցումը բարձր գնահատելով՝ ԱԱՏՄ-ն, այնուամենայնիվ, հորդորում է խստագույնս պահպանել հակահամաճարակային անվտանգության կանոնները:
ՀՀ առողջապահական եւ աշխատանքի տեսչական մարմինը նախատեսում է ստեղծել աշխատողների իրավունքների պաշտպանության նոր օնլայն հարթակ։ Այն կունենա որոշակի ընդհանրություններ Իրավաբանների հայկական ասոցիացիայի գործարկած bizprotect.am կայքի հետ, որը նախատեսված է բիզնեսից անանուն ահազանգերի ստացման համար։
ԱԱՏՄ-ն նախատեսում է առաջիկա ամիսներին ՄԱԿ-ի աջակցությամբ եւ Իրավաբանների ասոցիացիայի հետ գործակցությամբ գործարկել իր այս համակարգը, որով կընդունվեն անանուն դիմում-բողոքներ աշխատողների իրավունքների հնարավոր խախտումների մասին։
Տեսչական մարմինը կքննարկի եւ իր լիազորությունների շրջանակում ընթացք կտա դրանց։ Նոր համակարգով բողոքաբերը կարող է մնալ անանուն, չի բացահայտվի նրա համակարգչի IP հասցեն։
Նոր կայքի ստեղծմանը կհաջորդեն հանրության իրազեկման եւ դրանով աշխատելու՝ տեսչական մարմնի աշխատակիցների ուսուցման աշխատանքներ։
Նախաձեռնության նպատակն աշխատանքային իրավունքների վերահսկողության եւ տեսչական մարմնի հանդեպ վստահության բարձրացումն է։
Նախորդիվ թեմային առնչվող հարցեր են քննարկվել հեռավար հանդիպման ընթացքում, որին մասնակցել են ՀՀ ԱԱՏՄ ղեկավար Հակոբ Ավագյանը, ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյանը, Հայաստանում ՄԱԿ-ի զարգացման գրասենյակի ներկայացուցիչ Մարինա Մալխասյանը Իրավաբանների հայկական ասոցիացիայի նախագահ Կարեն Զադոյանը, ԱԱՏՄ ներկայացուցիչներ եւ այլ գործընկերներ։
Հիշեցնենք՝ արտակարգ դրության հետևանքով ստեղծված իրավիճակում կատարված օրենսդրական եւ ԱԱՏՄ կանոնադրության փոփոխություններով ԱԱՏՄ-ն այսուհետ իրավունք ունի գրավոր դիմումի հիմքով քննարկել և աշխատողների խախտված իրավունքները վերականգնելու միջոցներ ձեռնարկել:
Սակայն կան դեպքեր, երբ աշխատողն իր աշխատանքային խախտված իրավունքները բարձրաձայնելիս նախընտրում է անանուն մնալ։
© 2019