Месяц: Февраль 2026

Առողջապահական և աշխատանքի տեսչական մարմնում 2026 թվականի փետրվարի 20-ին, 24-ին և 27-ին անցկացվել է իրազեկման սեմինար նախադպրոցական հաստատությունների շուրջ 5 տասնյակ տնօրենների և ներկայացուցիչների համար։

Սեմինարը կազմակերպելու առաջարկով Տեսչական մարմնին էր դիմել Մասնավոր նախադպրոցական հաստատությունների աջակցման ասոցիացիան։

Միջոցառման մասնակիցներին ողջունել է Տեսչական մարմնի ղեկավարի տեղակալ Թագուհի Հակոբյանը։

Ղեկավարի տեղակալը շնորհակալություն է հայտնել Ասոցիացիայի խորհրդի նախագահ Նելլի Խաչատրյանին՝ նախաձեռնության և շարունակական համագործակցության համար։ Նա միաժամանակ նշել է, որ կանխարգելումը Տեսչական մարմնի առաջնային գործառույթն է, որն իրացնելով՝ ամրապնդվում է նաև հետադարձ կապը տնտեսավարող սուբյեկտների հետ։

Թագուհի Հակոբյանն առանձնահատուկ անդրադարձել է վերահսկողության շրջանակներում հաճախ հանդիպող կարևոր խնդրին՝ նախադպրոցական կազմակերպությունների բուժկետերի լիցենզավորման պահանջի խախտմանը,  ներկայացրել է համապատասխան օրենսդրական պահանջները։

Եռօրյա սեմինարը վարել են հիգիենիկ, սանիտարահիգիենիկ և հակահամաճարակային վերահսկողության վարչության պետ Աննա Հարությունյանը և վարչության գլխավոր մասնագետները, ինչպես նաև՝ աշխատանքային օրենսդրության իրավական վերահսկողության բաժնի պետ Ալվարդ Արշակյանը։

Ալվարդ Արշակյանը ներկայացրել է թվային համակարգի միջոցով աշխատանքային պայմանագրերի կնքման կարգը և հասանելիությունը թվային համակարգին, Աշխատանքային օրենսգրքում կատարված փոփոխությունները, ինչպես նաև՝ Աշխատանքային օրենսգրքի առանձին դրույթների կիրառման առանձնահատկությունները։

Աննա Հարությունյանը և վարչության մասնագետները ներկայացրել են Առողջապահության նախարարի հրամաններով սահմանված նորմերը, մասնավորապես՝ նախադպրոցական կազմակերպությունների սննդի կազմակերպման, վարակիչ հիվանդությունների կանխարգելման, ինչպես նաև հաստատություններին ներկայացվող հիգիենիկ պահանջների վերաբերյալ օրենսդրական պահանջները։

Միաժամանակ անդրադարձ է կատարվել Տեսչական մարմնի կողմից իրականացված վերահսկողության ընթացքում հաճախ հանդիպած խնդիրներին։

Սեմինարը զուգորդվել է ակտիվ քննարկմամբ, բանախոսները պատասխանել են մասնակիցներին հետաքրքրող հարցերին։

Առողջապահական և աշխատանքի տեսչական մարմնի արևմտյան տարածքային կենտրոնի աշխատողների կողմից 2026 թվականի փետրվարի 27-ին իրազեկման սեմինար է անցկացվել Արտաշատ համայնքի նախադպրոցական ուսումնական հաստատությունների տնօրենների, վարչական անձնակազմի և բուժաշխատողների համար։

Տարածքային կենտրոնի պետ Գնել Սարգսյանը ներկայացրել է Տեսչական մարմնի գործառույթներն ու դրանց շրջանակներում իրականացվող վերահսկողականաշխատանքները։

Քննարկվել են աշխատանքային պայմանագրերի կնքման և լուծումը կարգը, վերջնահաշվարկի, արձակուրդի տրամադրման կարգը, արտաժամյա և գիշերային աշխատանքին վերաբերելի կարգավորումները։

Տեսչական մարմնի աշխատակիցների կողմից ներկայացվել է նաև Առողջապահության նախարարի 2024 թվականի փետրվարի 12-ի N 50-Ն հրամանով հաստատված «Նախադպրոցական ուսումնական հաստատություններին ներկայացվող պահանջներ» 2.1.2.001-24 սանիտարական կանոններով և հիգիենիկ նորմատիվներով սահմանված օրենսդրական պահանջների պահմանման անհրաժեշտությունը։

Իրազեկման սեմինարի շուրջ 5 տասնյակ մասնակիցներն իրենց հարցերն են ուղղել Տեսչական մարմնի աշխատողներին և ստացել պատասխաններ։

Առողջապահական և աշխատանքի տեսչական մարմնի ղեկավարի տեղակալ Թագուհի Հակոբյանը սահմանամերձ համայնքներ կատարվող այցերի շրջանակներում այս անգամ եղել է Տավուշի մարզի Բերքաբեր գյուղում՝ իրազեկման միջոցառում իրականացնելով գյուղի միջնակարգ դպրոցում։

Միջոցառմանը մասնակցել է հիգիենիկ, սանիտարահիգիենիկ և հակահամաճարակային վերահսկողության վարչության պետ Աննա Հարությունյանը, ներկա են եղել տարածքային կենտրոնի աշխատակիցները։

Դիմելով դպրոցի անձնակազմին և աշակերտներին՝ Թագուհի Հակոբյանը մասնավորապես նշել է. «Սահմանամերձ համայնքների դպրոցները մեր ուշադրության կենտրոնում են։ Մեր գործառույթը ոչ միայն վերահսկողությունն է, այլև առաջին հերթին իրազեկումը և կանխարգելումը։ Առողջ և անվտանգ կրթական միջավայրը յուրաքանչյուր երեխայի իրավունքն է, և մենք պարտավոր ենք համատեղ ջանքերով ապահովել այն»։

Ղեկավարի տեղակալը ինտերակտիվ շփում է ունեցել աշակերտների և անձնակազմի հետ՝ ներկայացնելով Տեսչական մարմնի լիազորությունների շրջանակներում իրականացվող գործառույթները,  վերահսկվող ոլորտների առանցքային խնդիրները և պատասխանելով բազմաբնույթ հարցերին։

Հիգիենիկ, սանիտարահիգիենիկ և հակահամաճարակային վերահսկողության վարչության պետ Աննա Հարությունյանը դպրոցականներին ներկայացրել է.

• սանիտարական կանոնները հանրակրթական հաստատություններում,
• կրթական գործընթացի ռեժիմի կազմակերպումը,
• վարակիչ հիվանդությունների կանխարգելումը։

Դպրոցի տնօրեն Անի Արզումանյանը ողջունելով նախաձեռնությունը ընդգծել է, որ նման միջոցառումները նպաստում են գիտելիքների բարձրացմանը և պատասխանատվության ձևավորմանը՝ հանուն աշակերտների և անձնակազմի առողջության։

Այնուհետև Թագուհի Հակոբյանը հանդիպել է Բերքաբեր գյուղի բնակիչների հետ՝ հետաքրքրվելով վերջիններիս խնդիրներով։

Բնակիչները ջերմությամբ են արձագանքել Տեսչական մարմնի կողմից սահմանամերձ համայնքի բնակիչների խնդիրները ուշադրության կենտրոնում պահելու  նախաձեռնությանը՝ կիսվելով իրենց հուզող հարցերով, որոնց վերաբերյալ Տեսչական մարմնի ղեկավարի տեղակալի կողմից տրամադրվել է խորհրդատվություն։