Месяц: Октябрь 2024

Առողջապահական և աշխատանքի տեսչական մարմնի աշխատանքային օրենսդրության վերահսկողության վարչության կողմից 2024 թվականի հոկտեմբերի 17-ին իրականացվել է իրազեկման սեմինար՝ «Աշխատանքային իրավունքի բնագավառում իրականացվող վերահսկողությունը և առավել հաճախ արձանագրված խախտումները» թեմայով։

Սեմինարն անցկացրել են Աշխատանքային օրենսդրության վերահսկողության վարչության պետ Արա Մկրտչյանը, նույն վարչության՝ աշխատողների առողջության պահպանման և անվտանգության ապահովման վերահսկողության բաժնի պետ Աշոտ Հարությունյանը, բաժնի գլխավոր մասնագետ Ստեփան Շահումյանը և աշխատանքային օրենսդրության իրավական վերահսկողության բաժնի պետ Ալվարդ Արշակյանը։

Վարչության պետ Արա Մկրտչյանը սահիկաշարով ներկայացրել է հետևյալ թեմաները՝

• Ստուգումների պլանավորումը և ռիսկի վրա հիմնված ստուգումների համակարգը,
• Ստուգումների կազմակերպման և իրականացման գործընթացը,
• Վարչարարության հիմունքների և վարչական վարույթի դրույթները,
• Աշխատողների անվտանգությունը և առողջությունը։

Աշխատողների առողջության պահպանման և անվտանգության ապահովման վերահսկողության բաժնի գլխավոր մասնագետ Ստեփան Շահումյանը և Աշխատանքային օրենսդրության իրավական վերահսկողության բաժնի պետ Ալվարդ Արշակյանը ներկայացրել են

• Աշխատանքային իրավունքի բնագավառում առավել հաճախ արձանագրված խախտումերի վիճակագրությունը։

Աշխատանքային օրենսդրության վերահսկողության վարչության մասնագետները պատասխանել են նաև ներկաների հարցերին։

 
 

ՀՀ կառավարության 2024 թվականի հոկտեմբերի 18-ի N 1650-Ն որոշմամբ փոփոխություն է կատարվել «Հայաստանի Հանրապետության առողջապահական և աշխատանքի տեսչական մարմնի կողմից իրականացվող ռիսկի վրա հիմնված ստուգումների ստուգաթերթերը հաստատելու մասին» ՀՀ կառավարության 2020 թվականի 718-Ն որոշման մեջ։

Ըստ որի՝ նոր խմբագրությամբ շարադրվել են Բժշկական օգնության և սպասարկման վերահսկողության բնագավառում գործող ստուգաթերթերը։

Հաստատված ստուգաթերթերը հրապարակված են ՀՀ առողջապահական և աշխատանքի տեսչական մարմնի պաշտոնական կայքէջում https://www.hlib.am/checklists/

Առողջապահական և աշխատանքի տեսչական մարմնի տեսուչների կողմից շարունակվում են իրազեկման սեմինարները։ Հերթական սեմինարն անցկացվել է «Էրեբունի» բժշկական կենտրոն» ՓԲԸ-ում, որին մասնակցել են բժշկական կենտրոնի շուրջ 50 բուժաշխատողներ։

Տեսչական մարմնի Երևան քաղաքի տարածքային կենտրոնի բժշկական օգնության և սպասարկման վերահսկողության բաժնի պետ-տեսուչ Նաիրա Մերվազյանը բժշկական կենտրոնի բուժանձնակազմին ներկայացրել է «Բնակչության բժշկական օգնության և սպասարկման», «Լիցենզավորման մասին» ՀՀ օրենքները, 2024 թվականին ընդունված և ուժի մեջ մտած նորմատիվ իրավական ակտերը, անաշխատունակության թերթիկների տրամադրման կարգը, շարունակական մասնագիտական զարգացման հավաստագրի առկայության և այլ պետություններում բժշկական կրթություն ստացած անձանց փաստաթղթերի փոխճանաչման վերաբերյալ իրավակարգավորումները։

Անդրադարձ է կատարվել նաև բուժաշխատողների և բժշկական հաստատությունների կողմից պարբերաբար թույլ տրվող խախտումներին, որոնք արձանագրվել են Տեսչական մարմնի վերահսկողական աշխատանքների ընթացքում։

Բուժաշխատողները հարցեր են ուղղել Տեսչական մարմնի ներկայացուցչին և ստացել պատասխաններ. Տեսչական մարմնի լիազորությունների շրջանակից դուրս հարցերն ուղղորդել են ներկայացնել համապատասխան մարմիններ։