Месяц: Ноябрь 2023

 

ՀՀ առողջապահական և աշխատանքի տեսչական մարմնում նոյեմբերի 20-ին կայացել է աշխատանքային օրենսդրության վերահսկողության ոլորտի հերթական սեմինարը, որին մասնակցել են տարբեր կազմակերպությունների ավելի քան  երկու տասնյակ աշխատակիցներ։

Սեմինարը վարել են Տեսչական մարմնի Աշխատանքային օրենսդրության իրավական վերահսկողության բաժնի պետ Ալվարդ Արշակյանն ու նույն բաժնի տեսուչները։

ԱԱՏՄ աշխատանքային օրենսդրության իրավական վերահսկողության բաժնի պետը ներկայացրել է ՀՀ աշխատանքային օրենսգրքում կատարված և արդեն իսկ ուժի մեջ մտած էական փոփոխությունները, ինչպես նաև նոր ուժի մեջ մտնող դրույթները։

Տեղի է ունեցել հարց ու պատասխան. Տեսչական մարմնի աշխատակիցները պատասխանել են սեմինարի մասնակիցների հարցերին։

ՀՀ առողջապահական և աշխատանքի տեսչական մարմնի Արևմտյան տարածքային կենտրոնի աշխատակիցները շարունակում են իրազեկման սեմինարները։

Հերթական սեմինարը կայացել է Արագածոտնի մարզի Աշտարակ քաղաքի համայնքապետարանում։ Հանդիպմանը մասնակցել են շուրջ 36 նախադպրոցական կազմակերպությունների ներկայացուցիչներ։

Սեմինարը վարել են Տեսչական մարմնի Արևմտյան տարածքային կենտրոնի պետ Գնել Սարգսյանը, հիգիենիկ, սանիտարահիգիենիկ և հակահամաճարակային վերահսկողության բաժնի պետ-տեսուչ Հասմիկ Հարությունյանը, նույն բաժնի ավագ տեսուչ Քնարիկ Առաքելյանը և աշխատանքային օրենսդրության վերահսկողության բաժնի ավագ տեսուչ Մհեր Աղեկյանը։

Միջոցառման ընթացքում, նկատի ունենալով սեզոնային սուր շնչառական հիվանդությունների ակտիվության շրջանը, հիգիենիկ սանիտարահիգիենիկ և հակահամաճարակային վերահսկողության բաժնի մասնագետները մասնակիցներին ներկայացրել են օրենսդրությամբ պահանջվող հիգիենիկ նորմերի և ոլորտը կարգավորող իրավական ակտերի վերաբերյալ տեղեկատվություն։

ՀՀ աշխատանքային օրենսգրքով սահմանված նորմերի, աշխատանքային օրենսգրքի առանձին դրույթների կիրարկման առանձնահատկությունները, ինչպես նաև օրենսդրությունում կատարված նոր փոփոխությունները մասնակիցներին ներկայացրել է Տարածքային կենտրոնի աշխատանքային օրենսդրության վերահսկողության բաժնի տեսուչը։

Սեմինարի ավարտին տեղի է ունեցել հարց ու պատասխան։

Մասնակիցներն իրենց հետաքրքրող բազմաթիվ հարցերին ստացել են սպառիչ պատասխաններ։

 

 

ՀՀ առողջապահական և աշխատանքի տեսչական մարմինը, որպես դեղերի շրջանառության ոլորտում վերահսկողություն իրականացնող պետական մարմին, 2023 թվականի ընթացիկ ժամանակահատվածում իրականացրած վերահսկողական գործառույթների արդյունքում արձանագրել է բազմաթիվ խախտումներ, իսկ խախտում թույլ տված տնտեսավարող սուբյեկտների՝ խախտման համար պատասխանատու պաշտոնատար անձանց նկատմամբ կայացվել են տույժ նշանակելու մասին որոշումներ, ընդհանուր՝ 463․290․000 դրամ տուգանք։

Վերահսկողական միջոցառումների ընթացքում հայտնաբերված և արձանագրված խախտումների զգալի մասը վերաբերվել է չգրանցված դեղեր ներմուծելուն, դեղերն օրենքի խախտմամբ ներմուծելուն և չգրանցված կամ օրենքի խախտմամբ ներմուծված դեղեր իրացնելուն։

Վերահսկողության արդյունքում արձանագրված դեպքերի և պաշտոնատար անձանց նկատմամբ նշանակված տույժերի ընդհանուր վերլուծությունից պարզ է դարձել, որ հիմնական խախտումներն արձանագրվել են միմյանց հետ փոխկապակցված, դեղերի շրջանառության ոլորտում մեծածախ և մանրածախ իրացում իրականացնող մի քանի տնտեսավարող սուբյեկտների մոտ, իսկ 463․290․000 դրամ ընդհանուր տուգանքի մեծ մասը՝ 345․600․000 դրամ տուգանվել են խախտում թույլ տված վերոնշյալ տնտեսավարող սուբյեկտների պատասխանատու պաշտոնատար անձինք։

ՀՀ առողջապահական և աշխատանքի տեսչական մարմինը շարունակելու է դեղերի շրջանառության ոլորտում իրականացնել վերահսկողական միջոցառումներ՝ իր լիազորությունների շրջանակում կիրառելով օրենքով վերապահված ողջ գործիքակազմը։