Месяц: Ноябрь 2022

Իրազեկման սեմինար՝ ՀՊՏՀ ֆինանսատնտեսագիտական քոլեջի մանկավարժական կազմի և սովորողների համար

Առողջապահական և աշխատանքի տեսչական մարմնի աշխատողների առողջության պահպանման և անվտանգության ապահովման վերահսկողության բաժնի գլխավոր տեսուչներ՝ Ստեփան Շահումյանը, Կարեն Ղազարյանը և Լևոն Աբրահամյանը սեմինար քննարկում են իրականացրել ՀՊՏՀ ֆինանսատնտեսագիտական քոլեջի մանկավարժական կազմի և սովորողների համար։

Սեմինարն անցկացվել է աշխատող երեխաների՝ ՀՀ օրենսդրությամբ սահմանված երաշխիքների, աշխատատեղում անվտանգ աշխատանքային պայմանների ապահովման, երեխաներին աշխատանքի վատթարագույն ձևերում ներգրավման արգելման, ինչպես նաև հարկադիր աշխատանքի վերաբերյալ օրենսդրությամբ սահմանված դրույթների հանրային իրազեկման նպատակով։

Միջոցառումը կայացել է ՀՀ կառավարության 2021թ-ի սեպտեմբերի 30-ի թիվ 1622-Լ որոշմամբ հաստատված՝ Երեխայի իրավունքների պաշտպանության 2022 թվականի տարեկան ծրագրով, ինչպես նաև ՀՀ կառավարության 04.06.2020թ.-ի թիվ 909-Լ որոշման ՀՀ-ում 2020-2022 թվականների ընթացքում մարդկանց շահագործման (թրաֆիքինգի) դեմ պայքարի կազմակերպման ազգային ծրագրի իրականացման ժամանակացույցով հաստատված միջոցառումների շրջանակներում։

Տեղի է ունեցել հարց ու պատասխան, քննարկում։

 

Ստացվել է կեղծ դեղի հայտնաբերման ահազանգ

2022 թվականի նոյեմբերի 04-ին «Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲ ընկերությունից ստացված տեղեկատվության համաձայն՝ ՀՀ տարածքում ստացվել է կեղծ դեղի հայտնաբերման ահազանգ։

Ըստ այդմ.

«ՏԵՑԵՆՏՐԻՔ ԱՏԵԶՈԻԶՈՒՄԱԲ» խտանյութ կաթիլաներարկման լուծույթի 60մգ/մլ, 20մլ ապակե սրվակ, Շվեցարիա Ֆ. Հոֆման-Լա Ռոշ ՍՊԸ, 4303 Կայզերաուգստ-երկրորդային փաթեթավորող, բաց թողնման հսկող, Ռոշ Դիագնոստիկս ԳմբՀ, Սանդհոֆեր շտրասե 116, Մանհայմ, Բադեն Վուրթեմբերգ, 68305, Գերմանիա-բալք արտադրող, առաջնային փաթեթավորող՝ Ֆ. Հոֆման-Լա Ռոշ ՍՊԸ, Գրենզախերշտրասե 124, 4070 Բազել (Շվեյցարիայի համար) դեղի H0238B01 սերիայի դեղը արտադրողի կողմից հաստատվել է որպես կեղծված:

Հարգելի’ քաղաքացիներ, խնդրում ենք ուշադիր լինել և խուսափել տվյալ սերիայով դեղի օգտագործումից։

Նշանակվել է տուգանք, տրվել է կարգադրագիր

Հոկտեմբերի 10-ին ՀՀ առողջապահական և աշխատանքի տեսչական մարմնի (Տեսչական մարմին) «Թեժ գիծ» ծառայության հեռախոսահամարով քաղքացուց բողոք էր ստացվել, որ Ամիրյան փողոցում գործող սուպերմարկետներից մեկի սրահում ծխախոտի դարակաշարը բաց է և ծխախոտի գովազդ է իրականացվում։

Հոկտեմբերի 13-ին Տեսչական մարմնում հարուցված վարչական վարույթի շրջանակներում իրականացվել է զննում։

Զննման արդյունքում արձանագրվել է, որ վերոնշյալ հասցեում գործող սուպերմարկետի սրահում ծխախոտային արտադրատեսակներ իրացնելու (վաճառքի) համար նախատեսված դարակաշարը տեղադրված է եղել բաց վիճակում, սպառողի համար տեսանելի վայրում, որով խախտվել է «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» ՀՀ օրենքի 7-րդ հոդվածի 3-րդ մասով սահմանված պահանջը։

Հարուցված վարչական վարույթի արդյունքում կայացվել է վարչական տույժ նշանակելու մասին որոշում և նշանակվել է 150 հազար դրամի չափով տուգանք։ Տնտեսավարողին տրվել է կարգադրագիր՝ սահմանված ժամկետում ձեռնարկել համապատասխան միջոցառումներ՝ ապահովելու օրենքով սահմանված պահանջը, այն է՝ խանութ-սրահում ծխախոտային արտադրատեսակների իրացումը (վաճառքը) իրականացնել սպառողների համար ոչ տեսանելի  վայրում։