Месяц: Март 2026

2026 թվականի մարտի 3-ին Առողջապահական և աշխատանքի տեսչական մարմնի արևմտյան տարածքային կենտրոնի պետ Գնել Սարգսյանի գլխավորությամբ անցկացվել է իրազեկման սեմինար Վեդի համայնքի նախադպրոցական ուսումնական հաստատությունների և բժշկական ամբուլատորիաների տնօրենների, վարչական անձնակազմի և բուժաշխատողների համար։

Իրազեկման միջոցառման ընթացքում սեմինարի շուրջ 41 մասնակիցներին ներկայացվել են Տեսչական մարմնի լիազորությունները և դրանց շրջանակներում իրականացվող վերահսկողական գործառույթները։

Քննարկվել են աշխատանքային իրավահարաբերություններին վերաբերող մի շարք հարցեր, մասնավորապես՝

• աշխատանքային պայմանագրերի կնքման կարգը և բովանդակությունը,
• աշխատանքային պայմանագրերի լուծման և վերջնահաշվարկի վճարման կարգը,
• արձակուրդների տրամադրման և վճարման կարգը,
• արտաժամյա և գիշերային աշխատանքի առանձնահատկությունները։

Ներկայացվել են նաև ՀՀ առողջապահության նախարարի 2024 թվականի փետրվարի 12-ի N 50-Ն հրամանով հաստատված «Նախադպրոցական ուսումնական հաստատություններին ներկայացվող պահանջներ» 2.1.2.001-24 սանիտարական կանոններով և հիգիենիկ նորմատիվներով սահմանված պահանջների պահպանման հարցերը, ինչպես նաև վարակիչ հիվանդությունների կանխարգելմանը վերաբերող միջոցառումները։

Սեմինարի ընթացքում անդրադարձ է կատարվել նաև անաշխատունակության թերթիկների տրամադրման կարգին, դեղատոմսերի էլեկտրոնային եղանակով դուրսգրման ընթացակարգերին։

Միջոցառումն ավարտվել է ակտիվ քննարկմամբ և հարցուպատասխանով։

Առողջապահական և աշխատանքի տեսչական մարմնի ղեկավարի տեղակալ Թագուհի Հակոբյանի սահմանամերձ համայնքներ իրականացվող հերթական այցը Գեղարքունիքի մարզի Սոթք համայնքում էր։

Այցին մասնակցում էին նաև Տեսչական մարմնի հիգիենիկ, սանիտարահիգիենիկ և հակահամաճարակային վերահսկողության վարչության պետ Աննա Հարությունյանը, Արևելյան տարածքային կենտրոնի պետ Վահագն Մարտիրոսյանը և կենտրոնի բաժնի պետ Նելլի Աբրահամյանը։

Ղեկավարի տեղակալն այցը մեկնարկել է Սոթքի միջնակարգ դպրոցում իրազեկման միջոցառման անցկացմամբ։ Նա դպրոցի անձնակազմին և աշակերտներին ծանոթացրել է Տեսչական մարմնի գործունեության ուղղություններին, վերահսկողության ոլորտներին և դրանցից յուրաքանչյուրում օրենսդրության  հիմնական պահանջներին, որոնց խախտումներին կարող են առնչվել ուսուցիչներն ու աշակերտները։

Աննա Հարությունյանը ներկայացրել է հանրակրթական հաստատություններում գործող սանիտարական նորմերը, մասնավորապես․

• դասասենյակների հիգիենիկ պայմանները,
• դասացուցակների կազմումը,
• վարակիչ հիվանդությունների կանխարգելումը։

Նա միաժամանակ ներկայացրել է օրենսդրության առանձին պահանջները պահպանելու գործնական օրինակներ։

Դպրոցի տնօրեն Արտակ Մելքոնյանը, ողջունելով նախաձեռնությունը, կարևորել է սահմանամերձ համայնքներ իրականացվող այցերը և դպրոցներում առողջ ու անվտանգ կրթական միջավայրի ամրապնդմանը միտված իրազեկման միջոցառումները։

Իրազեկումն անցկացվել է ջերմ և անկաշկանդ մթնոլորտում, ուղեկցվել է ակտիվ հարցուպատասխանով։

Իրազեկման միջոցառումից հետո Թագուհի Հակոբյանին է վստահվել օրինակելի վարքի և աշխատասիրության համար աչքի ընկած աշակերտներին պատվոգրերի հանձնման արարողությունը։

Այնուհետև Տեսչական մարմնի ղեկավարի տեղակալը  հանդիպել է Սոթք համայնքի բնակիչների հետ, լսել նրանց մտահոգությունները, զրուցել Տեսչական մարմնի լիազորություններին առնչվող խնդիրների հնարավոր առկայության մասին, տվել է պարզաբանումներ և խորհրդատվություն։

Ուրախացնող է սահմանամերձ համայնքների բնակիչների ջերմ արձագանքը՝ Տեսչական մարմնի կողմից իրականացվող համայնքային այցերին և բնակիչներին մտահոգող խնդիրներին հատկացված ուշադրությանը։