Месяц: Декабрь 2025

Տնտեսավարողների իրազեկվածության բարձրացման նպատակով Առողջապահական և աշխատանքի տեսչական մարմնի աշխատողների կողմից շարունակվում են իրազեկման միջոցառումները։

Հյուսիսային տարածքային կենտրոնի աշխատողների հերթական սեմինարը կայացել է դեկտեմբերի 17-ին՝ Վանաձոր քաղաքի տնտեսավարողների 19 ներկայացուցիչներ համար։

Տարածքային կենտրոնի պետ Արման Ոսկանյանի գլխավորությամբ դեղերի շրջանառության վերահսկողության բաժնի պետ-տեսուչ Արմեն Պողոսյանի և նույն բաժնի դեղագետների կողմից սեմինարի շրջանակներում ներկայացվել է «Դեղերի մասին» օրենքով և նորմատիվ իրավական այլ ակտերով սահմանված դեղատոմսերի լրացման, դուրսգրման և բաց թողնման կարգը։

Տնտեսավարողներն աշխատանքային գործունեության ընթացքում  արձանագրված խնդիրների վերաբերյալ, որոնք վերաբերելի են Տեսչական մարմնի վերահսկության ոլորտին, հարցեր են ուղղել Տեսչական մարմնի աշխատողներին և ստացել սպառիչ պատասխաններ։

Առողջապահական և աշխատանքի տեսչական մարմնի հյուսիսային տարածքային կենտրոնի պետ Արման Ոսկանյանի և հիգիենիկ, սանիտարահիգիենիկ և հակահամաճարակային վերահսկողության բաժնի տեսուչների կողմից 2025 թվականի դեկտեմբերի 16-ին անցկացվել է իրազեկման սեմինար Վանաձոր քաղաքի տնտեսավարող սուբյեկտների 18 ներկայացուցիչների համար։

Տարածքային կենտրոնի տեսուչների կողմից ներկայացվել է բժշկական օգնության և սպասարկման ոլորտը կանոնակարգող ՀՀ օրենքների և այլ իրավական ակտերի պահանջների պահպանման ապահովման մասին տեղեկատվություն։

Սեմինարն ավարտվել է մասնակիցների հետ հարցուպատասխանով։

Առողջապահական և աշխատանքի տեսչական մարմնի կողմից  «Տոնուս-Լես» ՍՊ, «Ալֆա–Ֆարմ իմպորտ» ՓԲ, «Նատալի Ֆարմ» ՍՊ և «Էսկուլապ-Իմպորտ» ՍՊ ընկերություններին 2025 թվականի դեկտեմբերի 12-ին տրվել է «Ֆերետաբ քոմպ (երկաթի ֆումարատ, ֆոլաթթու), դեղապատիճներ կոշտ, 152,1մգ+0,5մգ (100/10×10/) բլիստերում» դեղի՝ G06831 (պիտանելիության ժամկետ՝ 31.05.2026թ) և F06988  (պիտանելիության ժամկետ՝ 31.01.2026թ․) սերիաների վերաբերյալ շրջանառության դադարեցման և հետկանչի կարգադրագիր։

Հետկանչի կարգադրագրի հիմք է հանդիսացել «Դեղերի և բժշկական տեխնոլոգիաների փորձագիտական կենտրոն» ՊՈԱԿ-ի կողմից 2025 թվականի դեկտեմբերի 12-ին ստացված թիվ 01/6156-25 գրությունը և կից փորձաքննության եզրակացությունը, համաձայն որի՝ առկա է հետկանչի ենթակա երկրորդ դասի թերություն (սպեցիֆիկացիաների կամ որակի նորմատիվ փաստաթղթի կամ դեղագրքերի պահանջների հետ անհամապատասխանություն)։

Գրանցման հավաստագրի իրավատեր՝ «Ացինո Ֆարմա ԱԳ» ընկերության տեղեկատվության համաձայն G06831 (պիտանելիության ժամկետ՝ 31.05.2026թ) և F06988  (պիտանելիության ժամկետ՝ 31.01.2026թ․) սերիաներով վերոնշյալ դեղը՝  նմուշների լաբորատորային հետազոտությունների ժամանակ հայտնաբերված երկաթի քանակական պարունակության՝ սպեցիֆիկացիայի սահմաններին չհամապատասխանող արդյունքի պատճառով ենթակա է հետկանչի։

Հաշվի առնելով վերոգրյալը՝ տրվել է կարգադրագիր արտադրանքի հետկանչ իրականացնելու վերաբերյալ։

Հարգելի´ քաղաքացիներ, քանի որ առկա է հետկանչի ենթակա երկրորդ դասի թերություն՝ խնդրում ենք ուշադիր լինել և խուսափել տվյալ դեղի վերոնշյալ սերիաների օգտագործումից: