Автор: Admin

Գործարկվել է Առողջապահական եւ աշխատանքի տեսչական մարմնի նոր կայքը՝ https://hlib.am/ հասցեով։ Այս հարթակում հասանելի են տեսչական մարմնի նորությունները, ԱԱՏՄ գործունեությանը, ստուգման տարեկան ծրագրին առնչվող եւ այլ տեղեկություններ։

Տեսչական մարմինը պատրաստ է արդեն նոր՝ 8107 թեժ գծով լսել քաղաքացիների բողոքներն ու առաջարկները՝ իր լիազորությունների շրջանակում դրանց արձագանքելու եւ ընթացք տալու։ Միաժամանակ, որպես թեժ գիծ շարունակում է գործել նաեւ (010) 65 03 05 հեռախոսահամարը։ Դրանով 2019-ին ստացվել է 351 զանգ։

Հարցերի գերակշիռ մասը վերաբերել է աշխատանքային իրավունքի և սանիտարահիգիենիկ ոլորտի խնդիրներին։ Զանգերի ակտիվությունը կտրուկ բարձրացել է հուլիսին՝ պայմանավորված հանրային օբյեկտներում աղմուկի, սննդի որակի, վարակների հավանական ավելացման ու այլ խնդիրների հետ։

Ըստ զանգերի վիճակագրության՝ աճի միտում ունեն հատկապես աշխատանքային հարաբերություններին առնչվող հարցերը։ Քաղաքացիները ԱԱՏՄ հաճախ են զանգահարում հետեւյալ հարցերով՝

• Սանիտարական նորմերի պահպանում,
• Կրթական հաստատություններում սանիտարական նորմերի խախտումներ,
• Դեղերի շրջանառություն և դեղագործություն,
• Աշխատողների անվտանգության ապահովում և առողջության պահպանում,
• Բուժսպասարկման որակ՝ բժշկական փաստաթղթերի լրացման և վարման կարգը
• Աղմուկ,
• Բժշկական թափոնների խնդիրներ,
• Ջրի որակին առնչվող խախտումներ,
• Աշխատավայրում կոլեկտիվ և անհատական պաշպանության միջոցների տրամադրման և կիրառման կարգ եւ այլն։

 

Արձանագրվել են մահվան բժշկական վկայականի տրամադրման եւ դիահերձման կարգի խախտումներ․ Առողջապահական եւ աշխատանքի տեսչական մարմին

Հիմք ընդունելով մարզային բուժհաստատությունում վարչական վարույթների արդյունքում ստացված տվյալները եւ ընթացք տալով տարածքային ստորաբաժանման պետի զեկուցագրին՝ Առողջապահական եւ աշխատանքի տեսչական մարմինը սեփական նախաձեռնությամբ վարչական վարույթ է հարուցել Նոյեմբերյանի տարածաշրջանի մի շարք բժշկական ամբուլատորիաների նկատմամբ։

Վարչական վարույթների ընթացքում արձանագրվել են մի շարք խախտումներ տնային մահերի դեպքում մահվան բժշկական վկայականների տրամադրման գործընթացներում։ Արձանագրվել են դեպքեր, երբ հարազատները հրաժարվել են դիակի հերձումն իրականացնել համապատասխան լիցենզիա ունեցող բժշկական հաստատություններում՝ հստակ ախտորոշելու մահվան պատճառ հանդիսացող հիվանդությունները, բայց միաժամանակ բացակայում են այդ մասին համապատասխան գրավոր հիմքերը։ Բուժամբուլատորիաներում, որոնց հանդեպ հարուցվել են վարչական վարույթներ, խախտումներով են վարվել կամ առհասարակ չեն վարվել մահվան դեպքերի գրանցամատյանները, օբյեկտիվ զննման որոշ տվյալներ չեն գրառվել ամբուլատոր քարտերում։

ԱԱՏՄ լսումների ընթացքում ի հայտ են եկել տեղեկություններ, որ Տավուշի մարզային որոշ համայնքներում դիահերձումը կամ այսպես ասած «մաքրումն» իրականացվում է առանձին ֆիզիկական անձի կամ անձանց կողմից՝ չպահպանելով ախտաբանաանատատոմիական թափոնների, առանձին օրգանների մեկուսացման, թաղման սանիտարական կանոնները եւ նորմերը, հիգիենիկ եւ հակահամաճարակային պահանջները։ Այսպիսի արատավոր երեւույթը մեկնաբանվում է դիահերձման տանելու ծախսերով, տեղափոխման տեխնիկական խնդիրներով եւ դիահերձարանների հեռու գտնվելով։

ԱԱՏՄ-ն, գործելով իր կանոնադրական լիազորությունների շրջանակներում, արձանագրված խնդիրների վերաբերյալ գրություններ է ուղարկել մարզպետերին՝ քայլեր ձեռնարկելու տնային մահերի դեպքում մահվան բժշկական վկայականների տրամադրման ընթացակարգի խիստ կանոնակարգման եւ հսկողության, տնային պայմաններում հերձումներ կատարելու հնարավոր երեւույթները բացառելու ուղղությամբ։ Միաժամանակ, նյութեր են նախապատրաստվում ՀՀ ոստիկանությանը տրամադրելու համար՝ հանգամանքները ճշտելու։

Մեր երկրում հնարավոր այսպիսի մտահոգիչ խնդիրներն արմատախիլ անելու ուղղությամբ ԱԱՏՄ-ն իր լիազորությունների շրջանակում քայլեր կձեռնարկի այլ մարզերում եւս։

ՀՀ առողջապահական եւ աշխատանքի տեսչական մարմինն ինչպես բժշկական ամբուլատորիաների աշխատակիցներին, այնպես էլ բնակչությանը հորդորում է զերծ մնալ՝ «Բնակչության բժշկական օգնության եւ սպասարկման մասին» ՀՀ օրենքով, Առողջապահության նախարարի 2008 թ․ մարտի 4-ի «Բժշկական թափոնների գործածությանը ներկայացվող հիգիենիկ եւ հակահամաճարակային պահանջներ» N 2.1.3-3 սանիտարական կանոնները եւ նորմերը հաստատելու մասին N 03-ն հրամանով սահմանված պահանջների խախտումներից։

Ախտաբանաանատոմիական հերձումները կարող են չիրականացվել` հիմք ընդունելով մահացածի կյանքի օրոք հայտնած կամքը կամ նրա հարազատների կամ օրինական ներկայացուցչի գրավոր դիմումը՝ բացառությամբ օրենքով սահմանված դեպքերի:

ՀՀ առողջապահական և աշխատանքի տեսչական մարմինը (ԱԱՏՄ) հորդորում է տնտեսավարողներին՝ հատուկ ուշադրություն դարձնել պարբերական բժշկական զննության անցկացման կարգի պահպանմանը։ Հիմք ընդունելով մտահոգիչ վիճակագրությունն առ այն, որ տեսչական մարմնի կողմից տնտեսավարող սուբյեկտների հանդեպ հարուցված վարչական վարույթների մեծ մասի դեպքում արձանագրվում են նշված կարգի խախտումներ՝ ԱԱՏՄ-ն խիստ միջոցներ է ձեռք առնելու։

Աշխատանքի վայրում մասնագիտական ռիսկի գործոնների ազդեցությանը ենթարկվող աշխատողները մինչև աշխատանքի ընդունվելը և աշխատանքի ընթացքում պարբերաբար պետք է բժշկական զննություն անցնեն։

 

• Գործատուն պարտավոր է ոչ ուշ, քան մինչև նախորդ տարվա դեկտեմբերի 1-ը տեսչական մարմնին ներկայացնել ու համատեղ որոշել պարբերական բժշկական զննության ենթակա աշխատողների թիվը։

Տեսչական մարմինն իրականացնում է հսկողություն նախնական և պարբերական բժշկական զննության ենթակա բոլոր աշխատողների պարտադիր բժշկական զննության ենթարկվելու և այն ժամանակին անցկացնելու նկատմամբ:

Կազմակերպության տնօրինությունը պատասխանատվություն է կրում նախնական և պարբերական բժշկական զննություն չանցած, ինչպես նաև բժշկական հակացուցումներ ունեցող անձանց աշխատանքի թույլատրելու համար:

• Պարբերական բուժզննություն անցկացնող բժշկական կազմակերպությունը պարտավոր է բուժզննման ամփոփ արդյունքները եզրափակիչ ակտով 15-օրյա ժամկետում գրավոր ներկայացնել կազմակերպություն և տեսչական մարմին:

Մասնագիտական ռիսկի գործոնների ազդեցությանը ենթարկվող աշխատողների ցանկում են, մասնավորապես, վնասակար քիմիական նյութերի հետ շփվող, արտադրական աղմուկի, ճառագայթման աղբյուրների պայմաններում, մեխանիկական սարքերի ու հաստոցների վրա, հանքարդյունաբերության ոլորտում աշխատողները և այլն։ Նրանց ցանկը հաստատված է կառավարության 1089-Ն որոշմամբ։ Բուժզննմամբ պետք է պարզվի հանձնարարվող աշխատանքներին աշխատողների առողջության համապատասխանությունը։

• Գործատուն պարտավոր է հետամուտ լինի աշխատանքի վայրում մասնագիտական ռիսկի գործոնների ազդեցությանը ենթարկվող աշխատողների նախնական և պարբերական բժշկական զննության անհրաժեշտ ծավալով և որակով կատարմանը։

Սա հնարավորություն կտա կանխել աշխատողների առողջական վիճակով պայմանավորված դժբախտ պատահարները և մասնագիտական հիվանդությունները և խուսափել վարչական պատասխանատվությունից:

Պարտադիր նախնական բժշկական զննություն չանցած կամ բժշկական հակացուցումներ ունեցող անձանց աշխատանքի ընդունելը, ինչպես նաեւ պարտադիր պարբերական բժշկական զննություննչանցած կամ բժշկական հակացուցումներ ունեցող անձանց աշխատանքի թույլատրելը առաջացնում է տուգանքի նշանակում նվազագույն աշխատավարձի քառասնապատիկից հիսնապատիկի չափով։

Դժբախտ դեպքերի կամ մասնագիտական հիվանդությունների հետևանքով ծագած դրամական պահանջները՝ կապված աշխատողի կյանքին կամ առողջությանը պատճառված վնասի հետ, հատուցում է գործատուն` օրենսդրությամբ սահմանված կարգով: