Նորություններ

ՀՀ առողջապահական և աշխատանքի տեսչական մարմնի մասնագետներն անցած շաբաթվա ընթացքում՝ մարտի 21-26-ը, հանրապետության ողջ տարածքում իրականացրել են 1190 ստուգայց՝ դիտարկելով առողջապահության նախարարի 17-Ն հրամանով սահմանված Covid-անվտանգության կանոնների պահպանումը։ ԱԱՏՄ մասնագետները բացահայտել են 4 խախտում և դրանց հիմքով կազմել ՎԻՎ արձանագրություններ։ Տնտեսավարողներից 4-ին տրվել է նախազգուշացում։ Նշված ժամանակահատվածում կայացվել է տուգանքի 2 որոշում։ Արձանագրված խախտումները վերաբերել են առողջապահության նախարարի 78-Ն հրամանի պահանջների չկատարմանը, այսինքն՝ չպատվաստված աշխատողների համար աշխատավայր ներկայանալիս յուրաքանչյուր 7 օրը մեկ կորոնավիրուսային հիվանդության ախտորոշման ՊՇՌ հետազոտության բացասական արդյունքը հավաստող սերտիֆիկատ ներկայացնելու պահանջին։

Աշխատանքային օրենսգրքի փոփոխությունները և տեսչական մարմնի գործառություները՝ սեմինարի թեմա

ՀՀ առողջապահական և աշխատանքի տեսչական մարմնի աշխատանքային օրենսդրության իրավական վերահսկողության բաժնի պետ Ալվարդ Արշակյանը մասնակցել է «ՀՀ աշխատանքային օրենսգիրք. սպասվող փոփոխություններ, ՀՀ առողջապահական և աշխատանքի տեսչական մարմին. կառուցվածքն ու գործառություները» թեմայով սեմինարին: Այն նախաձեռնել էր «Սոլիդարիթի սենթր» կազմակերպության հայաստանյան մասնաճյուղը։ Սեմինարի ընթացքում քննարկվել է ՀՀ աշխատանքային օրենսգիրքը, դրանում նախատեսված փոփոխությունները: ԱԱՏՄ աշխատանքային օրենսդրության իրավական վերահսկողության բաժնի պետը ներկայացրել է Տեսչական մարմնի կառուցվածքը, աշխատանքային օրենսդրության նկատմամբ վերահսկողական գործառույթները, ոլորտի ստուգումների համար նախատեսված և կառավարության կողմից հաստատված ստուգաթերթերը: Միջոցառմանը մասնակցել են նաև ՀՀ աշխատանքի և սոցիալական հարցերի նախարարության, Արհմիությունների և ուսումնական հաստատությունների ներկայացուցիչներ:

ՀՀ առողջապահական և աշխատանքի տեսչական մարմինն ու «Գործք» ՍՊ ընկերությունը սերտ կհամագործակցեն

Տեսչական մարմնի ղեկավարի տեղակալ Գոհար Դարբինյանը և «Գործք» ՍՊԸ գլխավոր տնօրեն Արմեն Սարգսյանն այսօր համագործակցության հուշագիր են ստորագրել։ Կողմերը համագործակցելու են հետևյալ ուղղություններով՝ տեղեկատվության փոխանակում, տեսչական մարմնի գործունեության լուսաբանում, պետություն-հասարակություն հետադարձ կապի ապահովում, աջակցություն հասարակության լայն շերտերին Տեսչական մարմնի հաշվետվողականությունն ապահովելու հարցում, տեսչական մարմնի կողմից գործատուներին և աշխատողներին հետաքրքրող հարցերին տրված խորհրդատվությունների հանրայնացում, «Գործք» ամսագրում ՀՀ առողջապահական և աշխատանքի տեսչական մարմնին հատուկ անվանական էջի տրամադրում: Հուշագրի նպատակը աշխատանքային իրավունքի և աշխատանքի անվտանգության պաշտպանության ոլորտում իրականացվող բարեփոխումներին հանրային ներուժի ներգրավումը, պետություն-մասնավոր ընկերություն-աշխատող հարաբերություններում գործընկերային վստահելի համագործակցության ձևավորումն է։