Նորություններ

Վարչական տույժ՝ «ՄԵԳԱՄՈԼ» առևտրի կենտրոնում հակահամաճարակային կանոնները չպահպանելու համար

«ՄԵԳԱՄՈԼ» առևտրի կենտրոնի 2-ամյակի կապակցությամբ առևտրի կենտրոնում կազմակերպված զանգվածային միջոցառման ժամանակ հակահամաճարակային կանոններն ու սանիտարական նորմերը չպահպանելու փաստի կապակցությամբ ՀՀ առողջապահական և աշխատանքի տեսչական մարմինը հարուցել էր վարչական վարույթ։ Գործի քննության ընթացքում հաստատվել է, որ միջոցառման ժամանակ ներկաները չեն կրել դիմակ և չեն պահպանել սոցիալական հեռավորության պահանջը, որով խախտվել են Հայաստանի Հանրապետությունում կորոնավիրուսային հիվանդության  տարածման կանխարգելման նպատակով կիրառվող պահանջները։ Ղեկավարվելով «Վարչական իրավախախտումների վերաբերյալ» ՀՀ օրենսգրքի համապատասխան հոդվածներով, որոշվել է իրավախախտման համար պատասխանատու  առևտրի կենտրոնի սեփականատեր «ՍԻԹԻ» ՍՊ ընկերության տնօրեն Վ. Ֆ-ին՝ որպես խախտում թույլ տված անձի, ենթարկել վարչական տույժի։

ՀՀ առողջապահական և աշխատանքի տեսչական մարմնի հիգիենիկ, սանիտարահիգիենիկ և հակահամաճարակային վերահսկողության վարչության պետ Աննա Հարությունյանը և նույն վարչության գլխավոր տեսուչ Լիլիթ Հունանյանը մասնակցել են «Ներուժի ստեղծում՝ Հայաստանում սնդիկի հավելիչներով արտադրանքի շրջանառությունից փուլային դուրսբերմանն աջակցելու համար» ծրագրի շրջանակներում կայացած եզրափակիչ աշխատաժողովին։ Քննարկվել են «Սնդիկի վերաբերյալ» Մինամատայի կոնվենցիայով Հայաստանի Հանրապետության ստանձնած պարտավորությունների շրջանակներում իրականացված աշխատանքները։ ԱԱՏՄ մասնագետները մասնակցել են քննարկումներին, ներկայացրել առաջարկություններ։ Նշենք, որ Մինամատայի կոնվենցիայի նպատակը մարդու առողջության և շրջակա միջավայրի պահպանումն է սնդիկի և սնդիկի միացությունների անթրոպոգեն ազդեցությունից։

Խստացված ստուգայցերը շարունակվում են

ՀՀ առողջապահական և աշխատանքի տեսչական մարմինը շարունակում է կորոնավիրուսային հիվանդության (COVID-19) տարածման կանխարգելման նպատակով վերահսկողությունը։ ԱԱՏՄ մասնագետները նախորդ շաբաթվա ընթացքում իրականացրել են ընդհանուր 1037 ստուգայցեր, որոնց արդյունքում արձանագրել են 57 խախտում։ Ըստ Տեսչական մարմնի տարածքային կենտրոնների, պատկերը հետևյալն է․ — Երևանի տարածքային կենտրոն՝ 739 ստուգայց, 29 խախտում, 10 իրավախախտում, 3 նախազգուշացում, 7տուգանք, — Հարավային տարածքային կենտրոն՝ 58 ստուգայց, 5 խախտում, 1 տուգանք, — Հյուսիսային տարածքային կենտրոն՝ 31 ստուգաց, 5 խախտում, 6 նախազգուշացում, 7 տուգանք, — Արևմտյան տարածքային կենտրոն՝ 94 ստուգայց, 10 խախտում, 4 նախազգուշացում, 6 տուգանք, — Արևելյան տարածքային կենտրոն՝ 115 ստուգայց, 8 խախտում, 3 նախազգուշացում, 9 ՎԻՎ արձանագրություն։