Շրջայց-իրազեկում՝ «Դեֆանս Հաուզինգ» թաղամասում

Առողջապահական և աշխատանքի տեսչական մարմնի Երևան քաղաքի տարածքային կենտրոնի աշխատողների առողջության պահպանման և անվտանգության ապահովման վերահսկողության բաժնի աշխատակիցները2026 թվականի սեպտեմբերի 11-ին շրջայց-իրազեկման աշխատանքներ են իրականացրել «Դեֆանս Հաուզինգ» թաղամասում՝ բազմաբնակարան շենքերի և համալիրների կառուցման շինարարական աշխատանքներ իրականացնող տնտեսավարողների մոտ։

Շրջայց-իրազեկման շրջանակներում հիմնականում անդրադարձ է կատարվել շինարարական աշխատանքների իրականացման ընթացքում աշխատանքի անվտանգության ապահովմանն ուղղված միջոցառումներին, մասնավորապես՝

• աշխատողներին՝ ըստ կատարվող աշխատանքների բնույթի, համապատասխան անհատական պաշտպանության միջոցներով ապահովվածությանը,
• աշխատավայրերի կոլեկտիվ պաշտպանության միջոցներով կահավորվածությանը՝ ցանկապատեր, պաշտպանիչ և արգելակիչ սարքեր, հարմարանքներ, անվտանգության նշաններ,
• առավել վտանգավոր շարժում կատարող մեքենաների, մեխանիզմների և գործիքների վրա նախազգուշացնող ազդանշանային սարքերի առկայությանը,
• առաջին օգնության միջոցների առկայությանը,
• աշխատողների համար անհրաժեշտ սանիտարահիգիենիկ և սանիտարակենցաղային պայմանների ապահովմանը՝ ցնցուղարան, հանդերձարան, հանգստի սենյակ և համապատասխան կահավորանք։

Իրազեկման ընթացքում մասնագետները պատասխանել են տնտեսավարողների և աշխատողների բարձրացրած հարցերին՝ ներկայացնելով աշխատանքի անվտանգության ոլորտում օրենսդրությամբ սահմանված պահանջները։

Շրջայց-իրազեկման աշխատանքները միտված են շինարարական հրապարակներում աշխատանքի անվտանգության պահանջների պահպանման մակարդակի բարձրացմանը, աշխատողների անվտանգության և առողջության համար անհրաժեշտ պայմանների ապահովմանը և հնարավոր դժբախտ դեպքերի կանխարգելմանը։

Վերադառնալ