ՀՀ տեսչական մարմնի արևելյան մասնաճյուղի աշխատակիցների ստուգայցերն այսօր ընթացել են Ծաղկաձորի մի շարք հյուրանոցներում, որտեղ ժամանակավոր բնակություն են հաստատել նաև արցախցի մեր հայրենակիցները:
Թերի լրացված ախտահանման գրանցամատյաններ, առանց ախտահանիչ նյութերի սանհանգույցներ, իրազեկման թերթիկների պակաս, առանց դիմակի հյուրեր․ այսօրինակ թերացումներ են նկատվել ստուգայցերի ընթացքում: ԱԱՏՄ աշխատակիցների կողմից տրվել են դրանք անհապաղ վերացնելու հանձնարարական:
ԱԱՏՄ-ն իրազեկում է՝ կորոնավիրուսի տարածումը հյուրանոցներում կանխելու և աշխատանքային անվտանգ միջավայր ապահովվելու համար սահմանված են առանձին նորմեր։ Մասնավորապես․
• Հյուրանոցը պետք է ունենա կորոնավիրուսային հիվանդության տարածման կանխարգելման նպատակով միջոցառումների պատասխանատու:
• Հյուրանոցում սանիտարական կանոնների պահպանման նկատմամբ պատշաճ հսկողությունը և կանոնների համար անհրաժեշտ պարագաների, նյութերի ու հարմարությունների առկայությունը պարտադիր է:
• Անհրաժեշտ է ապահովվել հերթափոխային աշխատանք:
• Ընդհանուր մուտքի, սանհանգույցի, խոհանոցային հատվածի, առանձին սենքերի մոտ պետք է տեղադրվեն տարաներ՝ ձեռքերի ախտահանման համար 60-80%-ոց ալկոհոլի հիմքով հականեխիչ/ախտահանիչ միջոցով՝ համաձայն Առողջապահության նախարարի 2010 թվականի հուլիսի 16-ի թիվ 13-Ն հրամանով հաստատված հավելվածի 24-րդ կետի:
• Անհրաժեշտ է ապահովվել աշխատատեղերի միջև առնվազն 1,5 մետր սոցիալական հեռավորություն:
• Աշխատատեղերը պետք է կահավորվեն կափարիչի ոտնակային հարմարանքով աղբարկղ՝ առնվազն 1 աղբաման 2 աշխատողի հաշվով՝ օգտագործված դիմակները և անհատական պաշտպանական այլ պարագաները նետելու համար:
• Հյուրանոցային տնտեսության օբյեկտում անհրաժեշտ է ապահովվել բնական օդափոխություն՝ յուրաքանչյուր երկու ժամը մեկ:
• Աշխատողներին պետք է ապահովվեն դիմակներով, ձեռքերի մշակման մաշկային հականեխիչների, ախտահանիչ միջոցներով, անձեռոցիկներով՝ առնվազն մեկ շաբաթվա պահուստային պաշարով:
• Ախտահանման աշխատանքները պետք է գրանցվեն համապատասխան գրանցամատյանում: