Առցանց հարթակում կայացել է Աշխատանքի միջազգային կազմակերպության կողմից Հայաստանում իրականացվող «Միասին նպաստենք Հայաստանում աշխատանքային իրավունքների իրացմանը» ծրագրի խորհրդատվական կոմիտեի հանդիպումը։
Մասնակցել են ՀՀ Աշխատանքի և սոցիալական հարցերի նախարարի տեղակալ Ռուբեն Սարգսյանը (Խորհրդատվական կոմիտեի նախագահող), ՀՀ առողջապահական և աշխատանքի տեսչական մարմնի (ԱԱՏՄ) ղեկավար Հակոբ Ավագյանը, Աշխատանքի միջազգային կազմակերպություն (ԱՄԿ) Արժանապատիվ աշխատանքի տեխնիկական աջակցության թիմի և Արևելյան Եվրոպայի ու Կենտրոնական Ասիայի երկրների գրասենյակի (ԱԱԹ/ԵԳ -Մոսկվա) փոխտնօրեն Միխայիլ Պուշկինը, Հայաստանի արհմիությունների կոնֆեդերացիայի փոխնախագահ Բորիս Խառատյանը, Հայաստանի գործատուների հանրապետական միության նախագահ Գագիկ Մակարյանը, մասնագետներ։
Ներկայացվել և քննարկվել են ծրագրի ընթացքն ու հետագա անելիքները։
Նշենք, որ Տեսչական մարմինը ծրագրի շահակիցներից է։ Ծրագրի նպատակն է՝ խթանել և զարգացնել Տեսչական մարմինը, նպաստել աշխատանքային օրենսդրության համապատասխանությանը և դատական ու արտադատական պաշտպանության միջոցների հասանելիության բարձրացմանը։
Ծրագրի շրջանակներում կատարվել է ԱԱՏՄ իրավական և ընթացակարգային գործառույթների վերլուծություն, ներկայումս իրականացվում է աշխատանքի տեսչության աշխատանքային հոսքերի քարտեզագրում: Մարտի 9-12-ը նախատեսվում է տեսուչների վերապատրաստում՝ կարողությունների հզորացման նպատակով։
Ծրագրի տևողությունը 3․5 տարի է։ Ֆինանսավորվում է ԱՄՆ-ի Աշխատանքի դեպարտամենտի կողմից։