ՀՀ առողջապահական և աշխատանքի տեսչական մարմնի ղեկավար Հակոբ Ավագյանը մասնակցել է «Մարդկանց թրաֆիքինգի և շահագործման իրազեկման և կանխարգելման» տեղեկատվական արշավի մեկնարկի ազդարարման միջոցառմանը։ Բացման խոսքով հանդես են եկել ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը, Հայաստանում ԱՄՆ փոխդեսպանի պաշտոնակատար Լիա Միլերը, Արդարադատության նախարարի առաջին տեղակալ Քրիստինե Գրիգորյանը։

Կարևորելով միջոցառումը՝ Հակոբ Ավագյանը ներկայացրել է ՀՀ աշխատանքային օրենսգրքում 2019 թվականի դեկտեմբերի 4-ի փոփոխությունների արդյունքում Տեսչական մարմնին վերապահված վերահսկողական նոր լիազորությունները, որոնք ամբողջությամբ ուժի մեջ են մտել 2021 թ.-ի հուլիսի 1-ից, թեև, համավարակով պայմանավորված, աշխատանքները սկսվել են դեռևս 2020 թ.-ի հուլիսից։ Հ․ Ավագյանը նշել է, որ 2020 թ․-ին հարուցվել է 149 վարչական վարույթ, որից 95-ը (հուլիսից սկսած) եղել է աշխատանքային իրավունքի վերաբերյալ։ 2021 թ․-ի առաջին կիսամյակի արդյունքներով՝ հարուցվել է 175 վարչական վարույթ, որից 136-ը՝ աշխատանքային իրավունքի վերաբերյալ։

«Այս ցուցանիշները վկայում են, որ աշխատանքային իրավունքի ոլորտում առկա բացն անհրաժեշտ է լրացնել, և այդ գործում ակնհայտ է Տեսչական մարմնի հանդեպ վստահությունը»,- նշել է Հ․ Ավագյանը։