Տեսչական մարմնի ղեկավարը ողջունել է Համագումարի պատվիրակներին ու հյուրերին և կարևորել մեր երկրում գործարար շահերը ներկայացնող միությունների, ասոցիացիաների և աշխատողների շահերը ներկայացնող արհեստակցական միությունների կայացումը։ Հակոբ Ավագյանը նշել է, որ պետք է առավելագույն ջանքեր ներդնել մեր երկրում նման ինստիտուտների կայացման և պետություն-մասնավոր հատված երկխոսությունը բարելավելու, որոշ դեպքերում՝ վերականգնելու հարցում։ Նրա կարծիքով՝ նման ինստիտուտների կայացումով հնարավոր կլինի հակակշիռ ապահվել պետական հատվածի նկատմամբ, մշտապես «ճնշման» տակ պահել քաղաքականություն մշակողներին և իրականացնողներին։

ԱԱՏՄ ղեկավարը շնորհակալություն է հայտնել ՀԳՀՄ նախագահ Գագիկ Մակարյանին։ «Եվս մեկ անգամ շնորհակալություն եմ հայտնում, պարոն Մակարյան, անձամբ Ձեզ, Ձեր ներդրած ավանդի համար ՀԳՀՄ-ի կայացման և զարգացման գործում։ Հաջողություն եմ մաղթում Համագումարին՝ հույսով, որ Համագումարով ընտրված նոր ղեկավար կազմը` անկախ անձերից, կշարունակի այն կուրսը, որ որդեգրվել է՝ շարունակել երկխոսությունը պետական հատվածի հետ, ակտիվ ազդեցություն ունենալ քաղաքականությունների մշակման աշխատանքներին»,- ասել է Հակոբ Ավագյանը։

ՀԳՀՄ նախագահ Գագիկ Մակարյանը ներկայացրել է Միության կատարած աշխատանքները՝ ըստ Միության գերակայությունների, այդ թվում՝ տնտեսական, սոցիալական, կրթական, բնապահպանական, ՓՄՁ և կանանց ձեռնարկատիրության զարգացման, աշխատանքի անվտանգության և աշխատանքային իրավահարաբերությունների ոլորտներում: Գագիկ Մակարյանի դիտարկմամբ՝ որպես ՀՀ կառավարության պաշտոնական սոցիալական գործընկեր կազմակերպություն, ՀԳՀՄ-ն իր գործառույթներում ներառել է հիմնական սոցիալ-տնտեսական այն ուղղությունները, որոնք համահունչ են տարբեր գերատեսչությունների առաքելությանն ու նպատակներին: