Անմիջականորեն բնակչությանը սպասարկող կազմակերպություններն աշխատակիցներին պետք է ապահովեն անհատական պաշտպանիչ միջոցներով

Հայաստանում արտակարգ դրության պայմաններում անմիջականորեն բնակչությանը սպասարկող կազմակերպություններն իրենց աշխատակիցներին պետք է ապահովեն անհատական պաշտպանիչ միջոցներով: Դրանք կգործեն առավել խիստ կարգավորումներով և պահանջով: ԱԱՏՄ-ն, որպես աշխատանքային իրավունքի պաշտպանությամբ զբաղվող տեսչական մարմին, այս հարցով դիմել է ՀՀ Պարետին։ Այս մասին նշել է ՀՀ առողջապահական եւ աշխատանքի տեսչական մարմնի ղեկավար Հակոբ Ավագյանն իր ասուլիսի ընթացքում։

• Եղել են ՀՀ ժամանած անձինք, որոնք փորձել են հրաժարվել գնալ մեկուսացման վայր։ «Անձամբ ես էլ եմ մասնակցել այդ բանակցություններին: Առողջապահության նախարարության գործընկերների երկար բանակցություններից հետո այդ մեկուսացումը տեղի է ունեցել»։
• «Զվարթնոց» միջազգային օդանավակայանից հունվարի 24–ից մարտի 18–ն ընկած ժամանակահատվածում հոսպիտալացվել է 65 քաղաքացի` գրիպի և ՍՇՎ–ի ախտանիշերով։
• «Հունվարի 24–ից ռիսկային երկրներից ժամանած 4993 ուղևոր տրամադրել է տեղեկատվություն իրենց հասցեների վերաբերյալ։ Մարտի 10–ից հետո հարցաթերթիկներ լրացնում են օդային տրանսպորտով Հայաստան ժամանած բոլոր ուղևորները։ Լրացվել է 19 900 հասցեական քարտ այն ուղևորների համար, որոնք ժամանել են ոչ ռիսկային երկրներից․ նրանց մասին տեղեկատվությունն արխիվացվել է։
• Ներդրվել է 14-օրյա պարտադիր մեկուսացման մեխանիզմ ռիսկային գոտուց ժամանող քաղաքացիների համար։
• Հանրապետության բոլոր հսկիչ անցակետերում հունվարի 24–ից իրականացվում է ուժեղացված ռեժիմով հերթապահություն, կրկնապատկվել է աշխատակիցների թիվը, նրանց տրամադրվել են պաշտպանիչ միջոցներ և հատուկ սարքավորումներ։
• Պատրաստվում են օրենսդրական փոփոխություններ՝ նպատակաուղղված ինքնամեկուսացման գործընթացի կարգավորմանն ու սահմանված ռեժիմի խախտման հետևանքներին։ «Պարետատունն աշխատում է նախագծի վրա: Եթե անձը սահմանային հսկիչ կետում (ցամաքային, օդային) ծանուցվում է, որ պետք է ինքնամեկուսացվի, բայց խախտում է, այդ տեղեկատվությունը գնում է ոչ միայն առողջապահության նախարարություն, այլեւ ոստիկանություն: Այդ օրենսդրական փաթեթի լինելուց հետո, եթե ծանուցվածը խախտում անի, կենթարկվի վարչական պատասխանատվության: Տարածքային ոստիկաններն էլ վերահսկելու են ծանուցված անձի ինքնամեկուսացման պահպանումը»:
• Պետք չէ տուրք տալ համացանցում կորոնավիրուսը բուժող դեղորայքի վերաբերյալ տարածվող հայտարարություններին։ Առողջապահական եւ աշխատանքի տեսչական մարմինը հորդորում է համացանցում միմյանց չփոխանցել այս մասին տեղեկատվությունն ու չտրվել չարդարացված սպասումներ առաջացնող գովազդային հայտարարություններին։

Վերադառնալ