ՀՀ-ում դադարեցվում է «ՈՒնիֆլեքս-Դուալ» ներարկման լուծույթ (արտադրող՝ Եվրոմեդիքակ, Վրաստան), սերիա` 030120, պիտանելիության ժամկետ՝ 01.02.2023թ. եւ «Բարալգին-ՈՒնի» ներարկման լուծույթ (արտադրող՝ Բիոպոլուս, Վրաստան) սերիա 030520 պիտ. ժամկետ՝ 01.06.2025թ դեղերի շրջանառությունը։ ՀՀ առողջապահական եւ աշխատանքի տեսչական մարմնի ղեկավարի կողմից տրվել է դրանց հետկանչի կարգադրագիր։
Դեղերի հետկանչի ավարտից հետո դեղի ոչնչացումը պետք է իրականացվի «Դեղերի մասին» ՀՀ օրենքի 23-րդ հոդվածի 2-րդ մասով, 26-րդ հոդվածով և ՀՀ առողջապահության նախարարի 2013 թվականի փետրվարի 1-ի «Դեղատներում կամ դեղատնային կրպակներում բժշկական թափոնների հաշվառման կարգը սահմանելու մասին» N 05-Ն հրամանով սահմանված կարգով։
Իրականացված միջոցառումների վերաբերյալ 3 օրը մեկ անգամ ներկայացնել հաշվետվություն Տեսչական մարմին՝ ՀՀ ք. Երևան, Նորք-Մարաշ, Ա. Արմենակյան 129 և info@hlib.am հասցեներով:
Շրջանառության դադարեցման եւ հետկանչի որոշման հիմքում են՝
— ՀՀ ԱՆ «Ակադեմիկոս Է. Գաբրիելյանի անվան դեղերի և բժշկական տեխնոլոգիաների փորձագիտական կենտրոն» ՓԲԸ 2020 թ․ սեպտեմբերի 18-ի թիվ 0101178020 և 0101177920 փորձագիտական եզրակացությունները, համաձայն որոնց՝ «ՈՒնիֆլեքս-Դուալ» ներարկման լուծույթ (արտադրող՝ Եվրոմեդիքակ, Վրաստան, պիտ. ժամկետ՝ 01.02.2023թ) դեղի 030120 սերիայի և «Բարալգին-ՈՒնի» ներարկման լուծույթ դեղի 030520 սերիայի լաբորատոր փորձաքննությունների ժամանակ հայտնաբերվել է որակի անհամապատասխանություն,
— «ՀՀ-ում չգրանցված կամ որակի պահանջներին չհամապատասխանող կամ պիտանիության ժամկետն անցած կամ գրանցումն ուժը կորցրած ճանաչված կամ գրանցումը կասեցված կամ ՀՀ օրենսդրության խախտմամբ ներմուծված դեղերի, կեղծ դեղերի, դեղանյութերի, դեղաբուսական հումքի, հետազոտվող դեղագործական արտադրանքի մասին ահազանգի ծանուցման, շրջանառությունը դադարեցնելու և շրջանառությունից հանելու (հետկանչի) կարգը սահմանելու մասին» ՀՀ կառավարության թիվ 164-Ն որոշմամբ հաստատված կարգը,
— «Դեղերի մասին» ՀՀ օրենքի 23-րդ հոդվածի 2-րդ մասը,
— ՀՀ վարչապետի 2018 թ․ հունիսի 11-ի N 755-Լ որոշմամբ հաստատված ՀՀ ԱԱՏՄ կանոնադրության 19-րդ կետի 7-րդ ենթակետի պահանջները։
ՀՀ առողջապահական եւ աշխատանքի տեսչական մարմինը հորդորում է դեղերի շրջանառությամբ զբաղվող տնտեսավարողներին՝ անմիջապես դադարեցնել նշված դեղի շրջանառությունը եւ վերադարձնել նշված սերիաների ողջ խմբաքանակները մատակարարներին։
© 2019