Տեսչական մարմնի ղեկավար Հակոբ Ավագյանը ներկայացրել է աշխատանքային իրավունքի վերահսկողության ոլորտում նախորդ տարվա ընթացքում իրականացված աշխատանքները, վիճակագրական տվյալներ։ Ինչպես նաև խոսել է Տեսչական մարմնի վերջին մեկ տարվա ընթացքում իրականացված բարեփոխումներից, 2021 թվականից ուժի մեջ մտնող լիազորություններին ընդառաջ արված նախապատրաստական աշխատանքներից։

Տեսչական մարմնի ղեկավարը, մասնավորապես, տեղեկացրել է, որ կարևոր գործառույթներ են վերապահվում Տեսչական մարմնին և միջոցառումն անցկացվում է իրազեկման աշխատանքների համատեքստում։

Հիշեցնենք, որ 2021թ․ հուլիսի 1-ից ուժի մեջ կմտնեն ՀՀ աշխատանքային օրենսգրքով Տեսչական մարմնին վերապահված մի շարք նոր լիազորություններ։ Իսկ մինչ այդ համավարակով պայմանավորված, Տեսչական մարմնի գործառույթներն օրենքով արդեն իսկ որոշակիորեն ընդլայնվել էին 2020 թվականի ապրիլին։

ԱԱՏՄ Աշխատողների առողջության պահպանման և անվտանգության ապահովման վերահսկողության բաժնի պետ Աշոտ Հարությունյանը ներկայացրել է Աշխատանքային իրավունքի ոլորտում պետական վերահսկողությանն առնչվող օրենսդրական փոփոխությունները։

ԱԱՏՄ Աշխատանքային օրենսդրության իրավական վերահսկողության բաժնի մասնագետ Գարիկ Պողոսյանը ընդգծել է ՀՀ աշխատանքային օրենսգրքում կատարված վերջին փոփոխությունները։

Հակոբ Ավագյանը շնորհակալություն է հայտնել Արդյունաբերողների և գործարարների միությանը, ՀՀ էկոնոմիկայի նախարարությանը՝ հանդիպումը կազմակերպելու հարցում աջակցության համար։

Տեղի է ունեցել քննարկում, հարց ու պատասխան։ Առաջարկվել է շարունակել քննարկումները նաև առանձին հանդիպումների ձեւաչափով։