ԱԱՏՄ բժիշկ-մասնագետներն այցելել են Վանաձորի ինֆեկցիոն հիվանդանոցում հոսպիտալացված քաղաքացիներին

ՀՀ առողջապահական և աշխատանքի տեսչական մարմնի հյուսիսային տարածքային կենտրոնի բժիշկ-մասնագետներն այցելել են երեկ սննդային գործոնով պայմանավորված աղիքային վարակ նախնական ախտորոշմամբ Վանաձորի ինֆեկցիոն հիվանդանոցում հոսպիտալացված Վանաձորի բնակիչներին։

Թունավորման հավանական պատճառը տնային պայմաններում պատրաստված կրեմային հրուշակեղենն է։ Հիվանդների վիճակը գնահատվել է միջին ծանրության, կա դրական դինամիկա։

ՀՀ առողջապահական և աշխատանքի տեսչական մարմինը, որպես բնակչության սանիտարահիգիենիկ անվտանգության ապահովման բնագավառում վերահսկողություն իրականացնող մարմին հիշեցնում է՝

Սննդային թունավորումներից և սննդային գործոնով պայմանավորված վարակներից խուսափելու նպատակով անհրաժեշտ է պահպանել սննդի պատրաստման և պահպանման սանիտարահիգիենիկ պահանջները.

• Մաքուր պահել ձեռքերը և սննդի պատրաստման համար հատկացված տարածքը,

• Առանձնացնել հում սնունդը եփածից,

• Լավ եփել, պահպանել մանրէների ոչնչացման համար անհրաժեշտ ջերմային ռեժիմը,

• Սնունդը պահել անվտանգ ջերմաստիճանում,

• Պիտանելիության ժամկետն անց սնունդ չօգտագործել,

• Օգտագործել անվտանգ հումք և ջուր,

• Կրեմային հրուշակեղեն պատրաստելիս նախօրոք լավ լվանալ հավկիթը։

  

Վերադառնալ