Աշխատաժողով՝ «Աշխատանքային իրավունքների պաշտպանությունը Հայաստանում՝ Մարտահրավերներ և հնարավորություններ» խորագրով

«Աշխատանքային իրավունքների պաշտպանությունը Հայաստանում՝ Մարտահրավերներ և հնարավորություններ» թեմայով աշխատաժողով է կայացել՝ պետական կառույցների և հասարակական սեկտորի ներկայացուցիչների մասնակցությամբ։

Աշխատաժողովը կազմակերպվել է Հայաստանում աշխատանքային իրավունքների պաշտպանության ոլորտում գործող տասնյակից ավելի կազմակերպությունների կողմից, որոնք միավորված են ԵՄ-ի «Մարդու իրավունքներ և ժողովրդավարություն Հայաստանում քաղհասարակության միջոցով» նախաձեռնության շրջանակներում երեք կոնսորցիումներում:

Միջոցառմանը մասնակցել են ՀՀ առողջապահական և աշխատանքի տեսչական մարմնի ղեկավարի պարտականությունները կատարող Սլավիկ Սարգսյանը, ԱԺ Աշխատանքի և սոցիալական հարցերի հանձնաժողովի նախագահի տեղակալ Զարուհի Բաթոյանը, ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը, Տեսչական մարմնի ղեկավարի տեղակալ Գոհար Դարբինյանը, Աշխատանքային օրենսդրության վերահսկողության վարչության պետ Իգիթ Հակոբյանը, Աշխատանքային իրավունքների պաշտպանության ոլորտում գործող մի շարք  հասարակական կազմակերպությունների ներկայացուցիչներ։

Աշխատաժողովի նպատակն է ամբողջացնել ՀՀ-ում աշխատանքային իրավունքների պաշտպանության մեխանիզմների հզորացման վերաբերյալ քաղաքացիական հասարակության կազմակերպությունների առաջարկությունները օրենսդրության, ինստիտուցիոնալ և գործնական կիրառման ուղղություններով:

«ԱԱՏՄ գործունեության ձեռքբերումները, գործառույթների լիարժեք իրականացման խոչընդոտները, կառույցի զարգացման հեռանկարները» թեմատիկ քննարկման շրջանակներում ՀՀ առողջապահական և աշխատանքի տեսչական մարմնի ղեկավարի պարտականությունները կատարող Սլավիկ Սարգսյանն անդրադարձել է ԱԱՏՄ գործունեության մշտադիտարկման արդյունքներին, գործունեության արդյունավետության բարձրացմանն ուղղված գործողություններին և կարիքներին։

Սլավիկ Սարգսյանը նշել է, որ տեսչական մարմնի ձեռքբերում է համարում յուրաքանչյուր խախտված իրավունքի վերականգնումը։ Շնորհակալություն է հայտնել գործընկեր կառույցներին համագործակցության համար՝ արդյունավետ համարելով  համանման աշխատաժողովները։

Վերադառնալ